Am Sunntig 13. Dezämber het unseri U18 in Kaiseraugst gspielt und im erschte Spiel gege UHT Schüpbach dütlig mit 2:6 verlore. Im zweite Spiel gege Kaiseraugscht het me sich einiges mee vorgno und grad in der erschte 2 Minute vier hochkarätigi Chance versibt. Noch dr erschte Druggphase vo Kaiseraugscht und ere Abweer im Torruum durch e UHMP Spieler, isch dr Gegner zu eme Penalty ko, aber kläglig am Muttenzer Schlussmaa gschiteret. Wie so oft kunnts in sottige Spiel uf Messersschneide zu dumme Goal. E individuelle Fääler het Kaiseraugst zum 1:0 usgnützt. Doch d'Muttenzer hän nit ufgä und sich noch eme Freistoss und em Abschluss vom Dennis Kramer s 1:1 könne sichere. Spöter isch me denn durch e Solo vom Jonas Eggmann sogar 2:1 in Front gange, abr het bald widr dr Usglych miesse in Kauf nä. Widr e individuelle Fääler. Doch d'Griffins hän nit ufgä und dr Tim Scheidegger schiesst 2 Minute vor Schluss s'vermeintlige Siegesgoal zum 3:2. Dr räscht vom Spiel muess unter dr Kategorie, komischi Entscheid, wenn stoppt me d'Effektivzyt und Päch abhöögle. Genau in däm Momänt, wo dr Ufruef zum Spieländ kunnt, fallt in eme Gerangel vor em UHMP Goal dr Usglych. Schad, denn kurz zuvor isch in dr gegenerische Platzhälfti e Stosse gege e Spieler us unsere Reihe pfiffe worde, obwohl er sälber an d'Bande druggt worde isch. Das denn d'Effektivzyt uns allne irgendwie sehr lang vor ko isch, au unsere Natelstoppuhre, liggt villicht au an dr rote Muttenzerbrülle. Jetz gohts im neue Joor witer und wenn me die individuelle Fääler ka usschalte und s'Niveau im Zämmespiel ka bhalte, denn ligge einigi Eier bis Oschtere drin. Schöni Wienachte ;-)
Keine Kommentare:
Kommentar veröffentlichen