Update aus der Meisterschaft

Herre:
Noch zwai verlorene Spiel gege Moutier und Riehe, trotz eme behärzte Ysatz und erschte guete Asätz im Spielaufbau, loht die erschti Mannschaft nit dr Kopf lo hänge, sondern versuecht d'Vorgob vom Trainer (2 Sieg us de letschte 4 Spiel) in Agriff z'nä. 10 Pünggt am Ändi vo dr Saison wäre e schöns Ergäbnis.

Juniore A:
Mit zwei Kantersieg gege Rynach und Münchestei feschtige d'A Juniore d'Tabällemitti. Unterstützt vo unsere B Juniore ka me guet mithebe, darf abr d'Arbet in dr Verteidigung nit vernochlässige.

Juniore B:
D'B Maischterschaft isch usgliche und spannend. 5 Teams kämpfe no um die erschte Plätz in dr Tabälle. Mit em dritte Rang und grad mol 1 Punggt Rückstand het UHMP grossi Chance am Änd vor dr Saison niemert mee vor sich z'ha. Es git glaub nur 1 Ziel!

Juniore C (M):
Unseri Zweitjüngschte dien sich die Saison schwer. Immer knapp dra und denn trotzdäm verlore. Das zeigt au s'Torverhältnis. Uf negschti Saison wird sich s'Glück sicher mol uf unseri Site wärfe und C Juniore könne denn am Änd au juuble.

Juniore C (P):
Mit ähnlige Sorge wie C Juniore us Muttenz, dien sich au d'C Juniore us Prattele umeschloo. Die sehr jungi Mannschaft hets schwer, abr dr Spass am Spiel und de Goal goht trozudäm nit verlore. Hopp Prattele!

Juniore D:
Wär hät das vor dr Saison dänggt. Punktemässig die beschti Mannschaft im Verein, das sin die Jüngschte! Es wird no um Platz 2 in dr Tabälle gege Fränkedorf kämpft. Überholet die nur!!!

Wänn mr luege, wie das ganze Ändi Saison usgseht

Vyl Erfolg allne Teams wünscht dr Präsi

Nachwuchs GF Meeting

Am Samstag 31. Januar findet das erste lokale Meeting im Bereich Nachwuchsförderung auf dem Grossfeld statt. Unihockey Muttenz-Pratteln beteiligt sich seinen Kräften entsprechend an der Startphase und sendet einige talentierte Junioren an diesen Event in der Joggeli Halle.

Vorstandssitzung Januar 09

Dr Vorstand het sich über folgendi Gschäft unterhalte

- Schirikontingänt 09/10
- Entschädigunge für Ämtli
- Lager und Juniorealäss
- Teams Saison 09/10

Mir wärde s'Schirikontingänt uf negscht Saison dangg em Ysatz vo unsere gstandene Kräft (Marcel und Cedi) und zwai neue GF Schiedsrichter/inne erfülle könne. Beschte Dangg an unseri Schiedsrichter.

Bald wärde mir für unseri "Vereinsmotörli" e klaine Areiz könne biete. Schiedsrichter, Trainer und teilwiis dr Vorstand, wo jedi Wuche für UHMP umerenne und alles am laufe halte, wärde für ihri Dienschtr entschädigt. Dodrmit solle sicher Spese deggt sy und es beinhaltet au e Dangg an die freiwilligi und gueti Arbet. Die beträffende Lüt wärde vo uns informiert.

Im Summer findet widr unser Juniorelager statt. Au do folge d'Infos, wenn alles plant isch! Büdnerland wir kommen...

D'veretilig vo de Teams vo dr neue Saison wird sich biz umgstalte. Im Juniorebereich wirds klaini Veränderige gä und mit em Zuezug vo unsere Damemannschaft tritt e neus UHMP Team in d'Liga.

Persönligs Votum vom Präsi:
Mir wänn unseri Strukture feschtige, Ämtli guet verteile und langsam Schritt für Schritt unseri Zuekunft in Agriff nä. Noch genau 1 Joor Zämearbet lauft vyles erstuunlig guet, abr Verbesserigspotential isch immer vorhande. Merci an alli mitwirkende Kräft.