Sensationelle Junioren B - Vizemeister West

Unseri Juniore B sin an dr Finalrundi vo dr Region Wescht erscht im Final bezwunge worde! Mit dr Silbermedaille und em gröschte Erfolg für d'Junioreabteilig vo Muttenz-Prattele het me sich us Zollikofen könne verabschide.

Exkurs SUHV-Finalrundi:
Es git im Juniore B Bereich schwyzwyt 160 Teams. Die spile in 16 10er Gruppe verteilt über s'ganze Land. D'Gruppesieger träffe sich an eme Finaltrunier noch dr reguläre Saison in einere vo 3 Regione (West, Ost, Zentral) und ermittle dr Regiomaischter. Wär zweite wird, befindet sich also unter de beschte 6 vo 160 Teams!!!


Dr Samschtig:
Mit eme Teambüssli isch es am Samschtig Mittag losgange in Richtig Zollikofe. Me ka sich usrächne wievyl Nervosität vor däm spezielle Alass umme gsi isch ;-)

Im erschte Spiel vo dr Vorrundi gege e Gaschtgäber Moosseedorf und zweimol ere gwunnene Halbzyt vo 3:2, isch dr Grundstei für dr Sunntig glegt gsi. In dr Vorrundi am Samschtig hän sich d'B Juniore uf e zweite Rang kämpft und somit e Halbfinalticket glöst. Dr UHC Walkringen het sich mit eme 8:6 gege unseri Juniore dr Gruppesieg gholt. Dä Matsch isch nit wunschgmäss glunge, het me doch am Schluss vom Spiel in Überzahl 2 Goal kassiert.


Dr Sunntig:
Im Halbfinal am Sunntig het me gege dr vermeintlig stärkeri Gegner us Laupe (Gruppesieger Gruppe 2) miesse aträtte. Schnäll mol sin d'UHMP'ler 1:0 in Fiehrig gange. Zur Pause aber denn scho mit 5:2 im Rückstand gläge. In dr zweite Hälfti het me sich Dangg ere super Laischtig vom Gaolie widr anekämpft und zum 5:5 usgliche! Es isch zu eme närveufriibende Spiel worde, wo erscht im Penaltyschiesse entschide worde isch. Fascht wärs abr gar nit derzue ko. Mit dr Schlusssirene isch no e Goal gfalle. Zum Glück für unseri Juniore het's nit zellt. Spiel isch bereits abpfiffe gsi. Es het e Penaltyschiesse ane miesse, indäm v.a. d'Goalie zeigt hän, was si könne. 2:1 oder 7:6 n.P. und somit dr Finalyzug für d'Jungs vo UHMP!!! Unglaublig!

Im andere Halbfinal isch ebefalls dr Gruppesieger gscheiteret. Walkringen isch Gürbetal Riggisbärg dütlig unterläge (8:3).

Es isch also zum Final vo de beide Gruppezweite ko. E hart umkämpfti Sach, wo schliesslig mit 7:4 entschide worde. Zerscht het dr Gegner gfiehrt, denn widr mir und mit em nötige Glück denn widr dr Gegner. Das, well 4 Schüss vo unsere Juniore nur an d'Goalumrandig dätscht sin, statt ins Netz. Am Schluss het d'Kraft nüm glänggt für die glychi Ufholjagd wie im Halbfinal. Gürbetal Riggisbärg het sich dr Titel "Regiomaischter Wescht Juniore B" gholt.


Mir freue uns über die tolli Laischtig vom Team um dr Beni Kappeler (Trainer) und gratuliere zur Silbermedaille.

Alli Resultat unter däm Link

http://www.swissunihockey.ch/weblounge/repository/tk/meisterschaft/saison_200809/junioren_finalrunden_aufstiegsturniere/aufgebote_resultate/Res.%20Junioren%20B%20West.pdf

Fötteli folge...

Mir wünsche allne Juniore e gueti Vorbereitig uf negscht Saison und hoffe dr Schwung fürs neue U18 Team mitnä z'könne. Hopp UHMP!!!

Saison für alle Teams beendet - Jun D

Mit de beide Spiel vo de Jun D het sich unseri erschti Saison scho widr verabschidet!

Jun D - Basel United 2:5

Jun D - Fränkedorf 9:8

Gwünne macht durschtig!

Garderobeparty

Suuberi Position vom Goalie

Flyssig am Dirigiere!

Merci vylmol allne für dr Ysatz in dere Saison und ganz e schöni Oschtere.
Dr Präsi

Jun B - Regionalmeister West ?

... am 26. April wüsse mir's! Unterstützet unseri Juniore im Hornets Dome.

U 18 Team für Saison 09/10

An dr Trainersitzig isch entschide worde uf d'Saison 09/10 us de beide Juniore Teams vo dr Kategorie A und B e U 18 Team uf em Grossfäld z'stelle. Das isch e Entscheid, wo ufgrund vo de Ergäbnis us dr laufende Saison und dr Motivation vo de Spiler ufs Grossfäld z'wägsle, troffe worde isch.

Dä Entscheid zieht abr einiges an Ufwand mit sich! Mir benötige mindeschtens eimol in dr wuche e 3-fach Halle fürs Training (analog em Herre Team) und dr ganzi Trainerstaff muess sich neu zämmesetze. Mir freue uns, dass für die Ufgob dr Beat Hänger als Trainer zruggkehrt und näbe em Beni Kappeler und em Guido Derungs das U-Team leitet. Es wird witeri unterstützig gä vo erfahrene junge und ältere Spiler bim Ufbau vo däm GF Team.

Mir informiere an dere Stell witer...