S'Herre Grossfäld Team isch guet in d'Saison gstartet. Im erschte Spiel gege Brugg het me 2:5 könne gwünne. Die erschte 3 Schüss ufs Goal sin grad erfolgrych gsi. So e effiziänte Start het me sälte gsee. Noch eme Freistoss eröffnet dr Tim Scheidegger s'Score zum 1:0 uf Pass vom Beni Meier, gfolgt vo eme satte Schuss vom Raphael Urbani, wo denn uf 2:0 erhöht. Elleistehend markiert dr Beni Meier s'dritte Goal. Kurz vor dr Pause glingt Brugg no dr Aschlussträffer. Noch eme abklärte Start in die zweiti Hälfti, ka dr Stephan Martin solo ufs Goal zieh und wird bim Abschluss regelwidrig behinderet, so dass es zu eme Penalty kunnt. Dr Beni Meier verwärtet zum 4:1. S'letschte Goal für Muttenz-Prattele erzielt denn widr dr Tim Scheidegger uf Pass vom Beni Meier, identisch wie zu Beginn. Brugg ka am Änd nur no Resultatkosmetik betrybe.
Im zweite Spiel het me e stärkerer Gegner erwartet und so isch es denn au use ko. E guets Stück het me gege Basel United könne mitheebe, wär do nit grad in dr zweite Minute s'1:0 gfalle. In dr Pause isch es 3:1 für Basel gstande. Dr Elias Schmid het für Muttenz könne träffe. In dr zweite Hälfti isch dr Matsch einiges härter gfiehrt worde. Fouls uf beide Site und au je e 2 Minute Strof sin usgsproche worde. Wo dr Beni Meier d'Teamstrof für vermehrte Stockschlag abgsässe het, het Basel mit eme schöns Goal (Schuss zwüsche de Bai dure) könne reüssiere. Do het au s'nit so schlächte Boxplay vo Muttenz-Prattele nüt drgege könne mache. Am Schluss gohts Spiel 1:5 verlore. D'Kraft het nonig ganz glängt für 2 Spiel uf em glyche Niveau.
Um dr Rhythmus byzbhalte het's am Donnschtig 30. Sept. e Teschtspiel gege Känelkinde gä. Numme grad 8 Spieler sin Muttenz-Prattele zur Verfiegig gstande. Während 4x20 Minute het's Team guet kämpft und die einti odr anderi Vorgob vom Trainer umgsetzt. 9:4 het me könne gwünne, wobi bis 3 Minute vor Schluss no 9:2 gstande isch. Konzentration het bi de kurze Wägsel mergglig noche glo.
Es hän gspielt: Flo (Goal), Manu (2), BeniK (2), RaphiR, Elias, Ervin, Steff (2), Urbani (1), BeniM (2)
